CCCLXXVI.

1493, Mai 10. Kamenz.

Vollmacht des Abtes Jacob für Urban von Littau, welcher zum Besten der abgebrannten Marienkapelle zu Wartha Almosen sammeln soll.

Nos frater Jacobus divina paciencia abbas monasterii Camenntcz sancte Marie ord. Cist. Wratislaviensis dyocesis universis Cristifidelibus tam spiritualibus, quam secularibus supremi, medii infimique status ac sexus utriusque, ad quos presentes nostre littere venerint, orationes in Cristo Jesu devotas cum imprecacione tocius boni pariterque salutis. Noverint universi presentes litteras inspecturi, quod capella gloriosisime et beatissime dei genitricis semperque virginis Marie in Wartha, que diversis indulgenciis tam summorum quam sancte Romane ecclesie cardinalium et diversarum dyocesum pontificum fulcitata et dotata est, prout littere desuper emanate clarioris continencie sint et tenoris, hec novissimis superioribus diebus, hew prochdolor, ignis incendio in suis structuris, campanis, libris et aliis ornamentis pro divino cultu necessariis prorsus exusta et consumpta est, nec propter hominum ibidem degencium, qui similiter dampnificati sunt [ad] inopiam, nisi pio aliorum Cristifidelium auxilio mediante restaurari potest. Nos itaque Jacobus abbas prememoratus, cum ad nos capella eadem iure pertinet, unanimo et maturo fratrum nostrorum consilio elegimus honestum, providum ac fidelem virum Urbanum civem Littoviensem presentium ostensorem, quatenus diversas civitates, opida, castra ac villas peragraret ad comportandum elemosinam pro restauratione capelle predicte campanarum librorumque ac aliorum ornamentorum eiusdem. Quare devotioni universitatis vestre in Cristo Jhesu ac matre eius virgine gloriosissima prehumilime supplicamus, dignemini presentium exhibitori, dum ab eo requisiti fueritis, fidem adhibere creditivam ipsique consilium, favorem, promotiones et adiutorium in sibi creditis impendere, mercedem a gloriosissima virgine filioque eius ac cumulum indulgenciarum capelle private multipliciter traditarum adepturi. Nos insuper constituimus nos cum fratribus nostris aput dominum deum fideles pro vobis exoratores presentibus a data submissa ad unum dumtaxat annum valituri. Datum in nostro monasterio Camenncz decima die mensis May anno domini millesimo quadringentesimo nonagesimo tercio nostro sub appenso sigillo.

Or. Perg. Das S. fehlt, nur ein Stück Pergamentstreifen noch vorhanden.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.